احلى طيف والله يجيك بالنوم

البارحة شفت الوطن بالطيف اجاني البارحة
كلت هلة ومية هلة يابو الخيول الجامحة
مديت ايدية اتسالمة شفت الكلب قبل الجفوف يصافحة
شلونك كلت يا موطني وظنوني جانت سارحة
وانكطع وسطي من الخجل وعيوني ظلت شابحة
كال اطمئن يا ولدي كفتنا هي الراجحة
كتلة يا موطني اليرد لحظانك الدافية تسامحة
كال اليرد والما يرد حتة الي يفكر بالوطن ذنوبة كلهن طايحة
بس اليخون بميتة ما يستاهل نقرة عليه الفاتحة
كتلة بعد عندي حجي يا موطني بغزرت دموعي المالحة
كال احجي كول اشما كلت طبع الوطن مثل الابو واجب عليك تصارحة
كتلة بويا يا موطني ليش انت من دون الدول صاحت عليك الصايحة
وليش انت من دون الدول بكل بيت عندك نايحة
وليش انت من دون الدول اطفالك الحلوين بالدم سابحة
وليش انت من دون الدول ناسك تصبح نازحة
وليش انت من دون الدول جيرانه كلها تواكحة
وليش انت من دون الدول يا ثور بالعالم قوي تركض عليه وتناطحة
متكلي منهو الخبلك يابو العقول الراجحة
شفتة ابتسم لمن حجة وجاوب اجابة واضحة
كال اعتقد يا ولد المشكلة مو بالوطن
المشكلة الحجاج هوة الذابحة
يبقى الوطن هوة الاصل والناس هية الرايحة
كفكف دموعك يا ولد اعرف غريب الدار شوكة الجارحة
واعرف غريب الدار اشما علة واشما كسب خسران كلما رابحة
حتى الطيور الها وطن تهاجر لمن يهزها الشوك ترجع باطحة
وحتى النخيل الها وطن ما تنزرع الة بارضنا المالحة
بس احنا لشوكت نبقى نحلم وطنا انصافحة
خلاف الوطن الناس مثل البهايم دايحة
والبارحة شفت الوطن بالطيف اجاني البارحة