حني حني( للشاعر عريان السيد خلف)

حني حني ..
شوية يا عين الخشف
خزرات المعاتب جوني
من كثر مالوع .. حته اهلي اصبحت جزعانه مني
رافكتني الونة والحسرات
من بطن الحملني
وهذا عمري ..
مكالب اوية الظيم
ما مر الضحج مرة اعله سني
وهذا حجي الناس ..
اون من لوعتي وكالو يغني
فتر عيونك .. تره عيونك كصن ..
بسنين عمري وذوبني
آنه احب منهن نبل مغتاض ..
خلهن يوجعني
ذابل وكاصي العطش وياي ..
جا هلبت وني؟؟
انسه حزنك .. لا يحن حزني
وعله عناد الحزن .. يازين .. أغني
حته اصيحن :
يا حسرتي تباعدي
ويا بسمتي الضاعت .. تدني
آخ مني ..
وآخ من روحي الكضت .. هذا العمر
بس بالتمني
وسرت بيها وصحت : يا روح
هدوة ليل عني
آنه موش اول هرش
واسن بسباحي اولوني
آنه مثل الناس ..
لكزني برمح بوك وجِفَني
ضيعن دمي ..
ولا جنهن الجاتل .. وانكِرَني
يالتلجين اعله شوفالسود ..
بس اكفن .. نسَني
ثكِلَن حمل البعد
وآنه الرجيج .. وكلِفَني
ذوبي من نار الجفه ..
وبدموعج اليجرَن تهني
وعني .. خليني استجن ..
يمعذبة شتردين مني؟؟
وهذا عمري .. مكالب اوية الظيم
ما مر الضحج مرة اعله سني
وهذا حجي الناس .. أون من لوعتي .. وكالو يغني